Ginbisitahan kag gin-inspect sang Department of Public Works and Highways – Bacolod City ang mga area nga ginbaha kahapon.
Sa interview sang Bombo Radyo Bacolod kay Ferdinand Magada, officer in charge sang DPWH – Bacolod, ginpakadtuan na nila sang maintenance personnel ang ginbaha nga mga area kalakip na ang Purok Carvic kag Buri Road sa Baran Mandalagan kag Country Homes Subdivision sa Barangay Estefania.
Sa pagtsekyar sila ang nakakita sang madamo nga mga basura nga nagclog sa drainage system.
Apang sila ang magapatigayon pa sang maid-id nga imbestigsayon sa kongkreto nga rasun sang madasig nga pagsaka sang tubig-baha.
Magapatigayon man sila sang cleanup sa mga water ways agud mahawanan ang mga nagasupon nga basura kag iban pa nga obstructions kaangay sang lutak.
Panawagan sini sa pumuluyo nga sila ang buligan man paagi sa husto nga pagdispose sang mga basura agud nga ini ang indi magclog sa drainage system sang ciudad. Samtang…nagrequest sang panibag-o nga declogging operation ang Punong Barangay sa Brgy Mandalagan kasunod sang nagluntad nga pagbaha kahapon.
Sa interview sang Bombo Radyo Bacolod kay Punong Barangay Paul Anieve, ang nagluntad nga pagbaha nga nagresulta sa malala nga trapiko sa dalan Lacson kahapon ang gintuga sang amo gihapon nga problema.
Kabahin sang interview kay Punong Barangay Paul Anieve sang Barangay Mandalagan, Bacolod City
Suno diri madamo sang mga basura nga nagasupon sa drainage system.
Nakaligad nga sinemana, sila ang nakapatigayon naman sang declogging apang bangod sa malapad nga area nga sakop sang Barangay Mandalagan, ini ang wala nila nasalama.
lKabahin sang Interview kay Ferdinand Magada, officer in charge sang DPWH – Bacolod
Samtang ang tubig gikan sa Purok 12 kag Purok Sambag ang nagakadto naman sa Purok Santol nga nagpalala pa sang pagbaha.
Ini ang tuga naman sang mga debris gikan sa construction nga ginapatigayon sa Buri Road.
Suno diri, madamo sang mga balas kag bato nga ginabyahe para sa construction ang nagakahulog sa dalanon.
Apisar nga ini ang ginapabantayan sa personnel sang Barangay, apang ginalantaw sini nga ginalipot lamang sila kag imbes nga kuhaon ang mga nagakahulog nga debris, ini ang ginasilhig panaog sa drainage.
Bangod sini, nagatambak na ang mga balas kag bato sa drainage system nga nagaresulta sa pagclog kag madasig nga pagbaha.
Pasalig sini nga sila ang nakarequest na sa Bacolod City Government kag Department of Public Works and Highways para sa declogging operations.
Ginpatsekyar naman ni Congressman-elect Alfredo ‘Albee’ Benitez ang drainage system sa Prk Santol nakaligad nga duha ka semana, kag sa pagpungko bilang Kongresista plano sini nga magtukod sang open canal.
Kun sa diin ang mga Purok nga malapit sa suba ang iderekta na lamang konekta sa suba kag indi na palabyun pa sa drainage sang Buri Road.
Samtang personal man nga gintsekyar sang Bombo News Team ang suludlon nga bahin sang Purok Carvic sa Brgy Mandalagan padulong sa sapa, nga nag-overflow kag isa sa nagtuga sang pagbaha.
Nakita mismo ang markings sang tubig nga tagalumapaw sa tawo.
Pahayag sang mga illegal settlers sa area nga hungod nga 2-storey ang mga balay sa nasambitan nga area bangod nakaandan na ang pagbaha sa tion sang mabaskog nga ulan.
