Nagtukod ang Department of Public Works and Highway (DPWH) sang isa ka Anti-Graft and Corruption Practices Committee para sa imbestigasyon sang ma-anomalya nga flood-control projects sa nagkalain-lain nga bahin sang pungsod.
Sa ginpagwa nga Department Order No. 166 series of 2025 nga ginpermahan ni DPWH Secretary Manuel Bonoan, tinutuyo sang komitiba nga magpatigayon sang madalom nga imbestigasyon sa mga flood-control projects kag posible nga korapsyon nga ginhimo sang pila ka mga opisyal kag empleyado sang nasambit nga ahensya.
Nakabutang man sa dokumento nga magatukod man ang ahensya sang isa ka Technical Working Group kun sa diin italana man ang secretariat nga maghatag sang assistance nga kinahanglanon sa imbestigasyon.
Samtang, nanindugan naman si Bonoan nga maskin sin-o nga maghimo sang anomaliya sa sulod sang ila ahensya ang dapat manabat sa layi.
