Ginakwestyon sang Alliance of Concerned Teachers (ACT) Partylist ang transparency ni Department of Public Works and Highways (DPWH) Secretary Vince Dizon sa imbestigasyon sa flood control scandal.
Sa interview sang Bombo Radyo Bacolod kay ACT Partylist Representative Antonio Tinio, nagapati ini nga indi pa kompleto ang ginpagwa nga mga dokumento ni Batangas Representative Leandro Leviste nga gikan kay late DPWH Undersecretary Maria Catalina Cabral.
Ini bangod luwas sa mga Senador kag Congressman, may-ara pa sang iban nga mga miyembro sang Executive branches.
Nagapati si Tinio nga lehitimo ang mga dokumento nga yara kay Leviste, bangod ini ang nagasanto man sa iban nga naggwa nga dokumento.
Pahayag sini nga may ara sang insider ukon whistle blower sa DPWH nga amo ang nagahatag sang impormasyon.
Apang nagapati si Tinio, nga ang mga dokumento ang wala lamang kay Cabral kag ini ang ma-access kun seryosohon ni Dizon.
Dugang pa sini nga luwas kay Cabral, si former DPWH Secretary Manuel Bonoan ang mas may ihibalo sa mga transaksyon bangod indi man madayun ang mga proyekto kag ma-award sa mga contractor nga wala sang ihibalo ang DPWH Secretary.
Apang sa paglupok sang isyu, si Bonoan ang ginpahanugutan lamang nga magresign kag magpalagyo sa luwas sang pungsod nga kaangay nga exempted sa imbestigasyon.
Suno diri, sarang gid nga mapapangita ni Dizon ang dokumento apang kaangay nga hungod nga wala ginapadaluman ang imbestigasyon.
