Ginkumpirmar ni Dr. Edwin Miraflor nga siya ang gin-appoint ni Mayor Evelio �Bing� Leonardia bilang bag-o nga officer-in-charge sang City Health Office.
Madumduman nga nagpasaka sang reklamo ang National Bureau of Investigation (NBI)-Bacolod City batok kay City Health Officer Dr. Carmela Gensoli bangud sa gina-alegar discrepancy sa pagreport sang COVID-19 results nagikan sa molecular laboratory sa Corazon Locsin Montelibano Memorial Regional Hospital sa Emergency Operations Center (EOC).
Nobyembre 16 sang ginpasakaan sang kaso sa City Prosecutor’s Office si Gensoli bangud sa paglapas sini sa Reapublic Act 11332 ukon Mandatory Reporting of Notifiable Diseases and Health Events of Public Health Concern Act kag RA 11494 ukon Bayanihan to Recover as One Act.
Sa interview sang Bombo Radyo kay Miraflor, ginpahayag sini nga una siya nga gin-appoint ni Gensoli bilang OIC sang Oktubre 19 tubtob Nobyembre 6 bilang OIC bangud nakaleave ini.
Sang Nobyembre 9, ang alkalde na mismo ang nag-appoint sa iya apang sang Nobyembre 17 lang niya ini nabaton.
Suno diri, gintransfer naman si Gensoli sa Economic Recovery Committee.
Suno sa bag-o nga OIC, padayon nga pagasuportahan sang CHO ang kampanya batok sang COVID-19 apang magluwas diri, nagpahanumdum ini nga may yara pa gihapon sang iban nga mga health concerns.
Pagahimuon man ni Miraflor nga prayoridad ang pagreview sang mga kakulangan sa CHO lakip na ang mga personnel, equipment kag mga proseso.
Ila man pagatutukan sa masunod nga bulan ang anti-paputok, anti-dengue kag AIDS awareness.
Nagpahanumdum man ini sa mga pumuluyo nga magsunod sa mga health protocols ilabi na sa palaabuton nga Paskwa kag likawan ang dalagko nga pagtililipon.
