Ginhatagan na sang direktiba sang director sang Bacolod City Police Office ang mga police stations nga sakop sang economic highway angot sa reported nga pagpatigayon sang drag race.
Sa interview sang Bombo Radyo kay Police Capt. Dax Santillan, station commander sang Bacolod Police Station 7, may direktiba na si Bacolod City Director Police Col. Joeresty Coronica nga hatagan sang pagtamod ang ginapatigayon nga drag race sa economic highway kag pagahatagan sang tikang nga matapna ini.
Suno diri, ila ginaverify ang report kun ano nga oras ginapatigayon ang karera kag kun may yara sang pustahanay.
Suno kay Santillan, indi gid man dako ang epekto sang drag race sa peace and order sa ciudad apang ginabawalan ini amo nga hatagan ini sa gihapon sang pagtamod.
Samtang, ginklaro naman sang Bacolod Police Staiton 10 nga wala sang may ginapatigayon nga drag race sa ila nga area of responsibility nga sakop ang economic highway.
Suno kay Police Capt Sherwin Galupar, station commander sang Bacolod Police Station 10, indi mahimo nga makapatigayon sang drag race sa ila nga area bangod nga visible ini sa ila kag mahapos lang dakpon ang mga involved sa karera.
Kasunod naman sa direktiba ni Bacolod City Director Police Col. Joeresty Coronica, ginapalibotan sini sang patrol ang area ilabi na kun gab-i.
