Ginsuguran na ang dredging sa Mandalagan River sa sakop sang Brgy 1, Bacolod City gamit ang amphibious dredger nga ginpahulam sang Department of Public Works and Highways-Negros Island Region (DPWH-NIR) sa Bacolod City Local Government Unit.
Sa interview sang Bombo Radyo Bacolod kay Bacolod City Mayor Greg Gasataya, base sa ginpatigayon nga hydrographic survey nakita nga tuman na kanabaw ang Mandalagan River rason nga indi maayo makagwa kag nagabalik ang tubig.
Suno kay Gasataya may yara sang siyam ka mga tributary creeks nga sa Mandalagan River nagalusot ang tubig.
Lakip diri ang creeks sa Montevista, Vista Alegre, Estefania, Bata, Villamonte, Mandalagan, kag sa bahin sang Barangay 1.
Ini ang rason kun ngaa kinahanglan nga mapadalom ang Mandalagan River agud man mapadasig ang pag-ilig sang tubig.
Ang dredging ang gin-umpisahan sa mismo sa baba sang suba, pasaka.
Sa inisyal ang mga nakuha nga basura amo ang nakita nga isa sa rason sang siltation ukon pagnabaw sang suba.
Aminado ang alkalde nga malawig ang patigayunon nga dredging bangud ang estimated nga makuha nga siltation sa suba ang yara sa 20,000 cubic meters.
Ang average nga makuha sang dredger ang yara 50 to 54 cubic meters per hour ukon 500 cubic meters per day gani ginalantaw nga sinemana matapos ang dredging sa Mandalagan River.
Suno sa alkalde indi man magic nga wala na sang baha nga magaluntad sa ciudad bangud ang purpose sang paglimpyo sang waterways amo nga mapadasig ang pag-ilig sang tubig kag madasig nga pagsubside sa tion nga magbaha.
Ang dredging ang isa man ka pamaagi sang pagrehabilitate sang suba bangud ang ulihi nga rehabilitation ang ginpatigayon sadtong 2016 pa.
Gin-updan ang aktibidad sang mga engineers kag mga Barangay Officials.
Suno kay Gasataya, may gingasto man ang ciudad bangud nagrenta sila sang barge agud nga butangan sang makuha sa suba agud madala sa higad.
Ginahimo na sang ciudad ang ila bahin sa paghatag sang solusyon sa problema sang pagbaha.
Nagaapelar man ang alkalde sa tanan nga mangin responsable sa paghaboy sang mga basura bangud ini ang isa sa mga rason sa pagsupon sang mga ginaagyan nga nagatuga sang pagbaha kag pagnabaw sang suba.
