Pilason ang driver kag duha ka pasahero sang tricycle matapos mabungguan sang SUV sa intersection sang Gatuslao Street kag corner sang Ayala Mall Capitol Central kag Negros Occidental Provincial Capitol sa Brgy 4. Bacolod City alas-7:00 kaina sang aga.
Ang Toyota Fortuner SUV ang ginamaneho ni Gerardo Gaspar, 42 anyos, kasado kag residente sa Sitio Mabalas-balas, Brgy Orong, Kabankalan City.
Samtang ang Honda TX100 nga tricycle ang ginamaneho naman ni Edwin Pendon, 54 anyos, balo, residente sa Prk Tilapia, Sto. Niño, Brgy 3, Bacolod City, kag siya ang may duha ka babayi nga pasahero.
Sa imbestigasyon, ang SUV ang may karga nga apat ka sako sang bugas nga ideliver kuntani sa Prk Bangros, Brgy 1, Bacolod City.
Apang pagdangat sa intersection, yara sa pula ang traffic lights apang napaslawan ang driver nga makaprino gani nabungguan sini ang tricycle.
Ang driver sang tricycle ang nag-angkon sang pilas sa ulo, samtang may mga injuries man sa lainlain nga bahin sang ila lawas ang duha ka pasahero.
Gilayon man nga gindala ang tatlo ka biktima sa ospital para sa nagakaigo nga pagbulong.
