Ginbawian sang kabuhi ang driver samtang pilason ang angkas sini matapos nga makabunggo ang ginasakyan nga motorsiklo sa Purok 4, Sitio Tingugtongan, Barangay-1 Poblacion, banwa sang Hinoba-an.
Ginkilala ang ginbawian sang kabuhi kay Meynard Renquijo, 27 anyos, may asawa, residente sang Sitio Hacienda Paz, Barangay Po-ok, samtang ang pilason ginkilala naman kay Elmer Canillada, 39 anyos, Soltero, nagapuyo sa Purok 5, Barangay 2-Poblacion sang nasambit nga banwa.
Sa interview sang Bombo Radyo kay Police Corporal Louie Sembrano, traffic investigator sang Hinobaan Municipal Police Station, mahimo nga madasig ang pagpadalagan sang driver sa ginamaneho nga motorsiklo kag pag-abot sa liko-on nga bahin sang nasambit nga lugar wala sini matantya kag derecho tubtob nga nabunggo sa railings nga gintunaan sang aksidente.
Gindala man sa balay bululngan ang duha, suno sa attending physician nakaangkon sang samad sa dughan ang driver nga gindeklarar nga dead on arrival samtang pilas naman sa abaga ang naagom sang angkas sini.
Ginpahayag man ni Sembrano nga wala sang helmet ang duha.
Ginpahayag man sang imbestigador nga bangud sa mabaskog nga impact nakakas ang isa ka guma sang suzuki raider 150 nga motorsiklo nga ginadala ni Ronquillo.
Miyembro man ang napatay sa motorider club nga nabase sa Hinoba-an kag bag-o lamang nakasal.
