Patay ang isa ka lalaki nga nagasakay sa motorsiklo matapos nga makabunggo sa steel post signage sang Department of Public Works and Highways (DPWH) sa Lacson St, boundary Bacolod-Talisay City, kahapon sang kaagahon.
Sa interview sang Bombo Radyo Bacolod kay Police Major Elmer Bonilla, Traffic Enforcement Unit Head sang Bacolod City Police Station, ang biktima ang ginkilala nga si Teddy Juarez, residente sang Brgy Lantad, Silay City, Negros Occidental kag nagamaneho sang Honda XRM 125 nga motorsiklo.
Suno kay Bonilla, ang biktima ang nagabiyahe halin sa Sur padulong sa Norte nga bahin sang ciudad.
Aksidente nga nabungguan sini ang steel post signage sang nasambit nga ahensya.
Nakaangkon sang nagkalain-lain nga samad sa lawas ang biktima kag ginalantaw nga may igo ini sa ulo nga gintunaan sang kamatayon sini.
Ginpahayag nga nakasuksok sang helmet ang biktima kag may valid drivers licensed samtang wala man nawasak ang motorsiklo.
Dugang pa ni Bonilla nga may nakakita sa biktima nga medyo madasig ang padalagan sang biktima kag padayon pa ang ila nga imbestigasyon agud nga mahibaluan ang rason kun ngaa nakabunggo ini sa signage.
