Yara na sa maayo nga kahimtangan ang driver sang ten-wheeler truck nga may karga nga masobra 50 ka sako sang bugas nga nakabunggo sa isa ka establishemento sa Bata Flyover, Barangay Banago, ciudad sang Bacolod kahapon sang udto.
Ang drayber sang truck ang ginkilala nga si Jonathan Pineda.
Nagluntad ang insidente pasado alas-11:00 sang udto kahapon matapos nga makabunggo ang truck nga sakay lamang ang drayber.
Nagsulod ang ulo sang truck sa establishemento nga nagapabudlay sa pagpatigayon sang pag-rescue kay Pineda.
Sa interview sang Bombo Radyo kay Police Major Ramel Sarona, pinuno sang Bacolod Traffic Enforcement Unit, ang 10-wheeler ang padulong kuntani sa Banago Port sa ciudad sang Bacolod apang ini ang nadulaan sang control gani nakabunggo ini sa isa ka establishemento.
Suno kay Sarona, sa circumferential road nag-agi ang ten-wheeler truck kag nagliko sa Barangay Bata kun sa diin nadulaan na ini sang preno kag nakabunggo sa store kun sa diin ginrescue ang driver matapos maipit.
Wala na sang iban nga nasaraman bangud wala man sang tawo sa nabungguan nga baligyaan.
Suno sa pinuno sang Bacolod Traffic Enforcement Unit, nahulat nalang sa karun nga makaestoryahanay ang tag-iya sang nabungguan nga store kag ang driver sang ten-wheeler truck agud nga mahibaluan ang desisyon angot sa nagluntad nga aksidente.
