Napasakaan na sang kaso ang driver sang 6-wheeler truck nga nakabunggo kag nakapatay sa duha ka babayi nga sakay sa motorsiklo sa National Highway, Osmenia Avenue, Barangay 21, Victorias City sang Nobyembre 24.
Ang suspetsado ang ginkilala nga si Jun Jun Onenia, residente sang Cadiz City apang temporaryo nga nagapuyo sa ciudad sang Silay, samtang ang mga biktima amo sanday Grace Telebrico, 23 anyos, residente sa nasambitan nga barangay kag Julie Ann Broce, 41 anyos, residente sa Barangay 10, Victorias City.
Santo sa imbestigasyon, bangod mataas ang truck, naga-inulan kag madulom pa ang palibot bangod kaagahon, wala nakita sang driver nga may paliko nga motorsiklo gani iya ini nga nabungguan.
Apang wala naman nagdulog ang driver kag nagsungka na lamang pagkahapon sa Bacolod Police Station 6.
Suno kay Police Major Joy Ellaga, deputy chief sang Victorias City Police Station, gilayon naman nga ginturn-over ang driver sa kustodiya sang Victorias City Police Station samtang wala naman nagsugot sa settlement ang pamilya sang mga biktima.
Sang Sabado, nafile na ang kaso nga reckless imprudence resulting to multiple homicide sa suspetsado.
