Padayon nga naka-confine sa ospital ang driver sang delivery van nga nakabunggo sa canter truck sa Sitio Punod, Brgy Rizal, San Carlos City, kahapon, alas-9:00 sang aga nga nagresulta sa pagkapatay sang isa kag napulo nga nasamaran.
Sa interview sang Bombo Radyo Bacolod kay Police Lt. Col. Nazer Canja, hepe sang San Carlos City Police Station, ang delivery van driver kag apat ka iban pa ang nagapabilin nga naka-admit sa ospital sa San Carlos City matapos makaagom sang samad tuga sang aksidente.
Samtang ang pahinante kag ang iban pa nga nakaagom sang minor injuries ang nakagwa na out patient na.
Suno kay Canja ang delivery truck ang halin sa Bacolod City nga magadeliver sang goods sa isa fastfood chain.
Suno diri, nadulaan sang preno ang delivery van apang ginkay-o sang driver.
Sang ginpalakat sang driver ang van wala gihapon nagkagat ang preno kag sang nag-abot sa dulhugon nga bahin sang dalan wala makontrolar sang driver ang van kag ginkaon ang pihak nga lane.
Ini ang rason nga nabungguan sini ang sugata niya nga canter truck nga pataklad kag padulong sa Barangay Quezon para sa blood letting activity.
Ang napatay ang nahibaluan nga isa ka Barangay health aide nga padulong kuntani sa blood letting mission.
Nahibaluan ang delivery van ang ginamaneho ni Artemio Evangelista, 49 anyos, residente sang Brgy. Old Escalante, Escalante City; kag helper sini nga si Roy Nagre, 39 anyos, residente sang Brgy. Miranda, Hinoba-an.
Sakay naman sa Canter Truck ang napatay nga Barangay Health Aide nga si Perfecto Magbanua, nga nabuka ang bagol; samtang pilason naman ang driver nga si Alex Genon, 35 anyos, kasado, residente sang Sitio Lapu-Lapu, Brgy. Quezon, San Carlos City, nga nag-agom sang pilas sa tiil kag sa agtang; Dr. Minerva Alcarde, 80 anyos, Physician sa City Health Office nga napilpilan sang canter truck kag nag-agom sang pilas sa tiil kag spine injury, apang sa karun estable na ang kondisyon; Marian Garcis, 49 anyos, nag-agom sang pilas sa ulo kag bukol sa agtang; Audie Emmanuel Hemida, 38 anyos, single, Local Government employee, residente sang Habitat, Brgy. Palampas, San Carlos City; Kristine Miñosa, 43 anyos, kasado, Medical Technician, residente sang Burgos St., Brgy 6, San Carlos City; Valaine Dineros, 42 anyos; Cris Ian Caballero, 49 anyos; Sharon Rose Valderrama; kag Vertil Alipis, 55 anyos.
Wala pa sang pag-estoryahanay sa tunga sang driver sang van kag pamilya sang napatay kag mga nasamaran.
