Patay ang driver sang dump truck matapos nga ini ang nahulog sa pangpang sa dam site, Purok Abellana, Brgy. Masulog, Canlaon City, Negros Oriental sang Miyerkules sang aga, Hulyo 31.
Ginkilala ang biktima nga si Richard Mission, 49 anyos kag residente sang nasambit nga lugar.
Sa interview sang Bombo Radyo Bacolod kay Police Staff Sergeant Edward Intes, imbestigador sang Canlaon City Police Station, si Mission ang nagamaneho sang truck nga nagahauling sang balas nagikan sa Javellana River sa nasambit nga lugar.
Suno kay Intes, pabalik na ini kuntani sa proper sang Barangay Masulog agud nga i-ariya ang balas apang bangud sa indi maayo nga dalan, namiscalculate niya ini rason nga nagtakilid ang truck.
Suno diri, bangud wala man sang puno nga masagang sa truck, nahulog ang driver kag nagbulid-bulid paidalom.
Ginsubay man ini sang iya mga upod apang bangud sa kadalumon sang gintup-an sini wala ini gilayon makita.
Ulihi naman nga nareport kag nakatawag sang rescuer bangud sa kabudlayan sang signal agud makacommunicate sa lugar.
Wala man sang upod si Mission nga nagmaneho sang truck agud nga magkuha sang balas.
Ginabanta naman nga 50 ka tapak ang gintup-an ni Mission kag ginalantaw nga makaapat ka beses nga nagligid sa banglid.
Nakaagom sang pilas sa ulo kag bali sa abaga ang biktima nga ginalantaw gintunaan sang kamatayon sini.
