Patay ang driver sang dumptruck matapos nabungguan sang ginamaneho niya man mismo nga Isuzu dumptruck sa Purok Sabes, Barangay Villamonte, Bacolod City sang Lunes sang aga.
Ginkilala ang biktima kay Ernie Alegia, 46 anyos kag residente sang banwa sang Murcia, Negros Occidental.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 4, nagpanaog ang biktima agud nga mag-unload sang karga nga balas apang hinali lang nga nag-abante ang salakyan.
Suno kay Cayao, naghingagaw kadto sa unahan sang dump truck ang biktima agud nga punggan ini apang bangud sa kabug-aton, gindusdos ini padulong sa concrete wall sang ginaubra nga warehouse.
Nakaagom sang patal nga pilas sa nagkalain-lain nga bahin sang lawas ang biktima kag gindeklarar nga dead on arrival sa ospital.
