Pilas sa baba ang naangkon sang driver sang Handumanan-Libertad nga jeep matapos ginpakal sang bato sa Purok Kabugwason, Barangay Mansilingan, Bacolod City.
Sa interview sang Bombo Radyo kay Sebastian Tuazon, halin siya sa terminal kag sang nag-abot sa Barangay 40 may isa ka pamatan-on ang nagpahayag nga magakuya sang sensilyo sang iya pamasahe.
Suno kay Tuazon, ginsabat niya nga indi siya ang nagsukot sa iya kag ginlantaw sini ang kwarta sa iya bulsa kun sa diin Nakita niya nga insaktuhan lamang ini.
Ginsabat pa siya sang pasahero nga sige nalang kag daguro niya nalang kay Tuazon ang sensilyo sa iya pamasahe.
Nagsige man sa pagbuyayaw sa driver ang pasahero.
Suno sa driver sang nag-abot ini sa Purok Kabugwason dali dali nagpanaog ang suspek nga dali dali man nga nagtabok.
May tatlo ka mga pamatan-on nga nagpalapit sa driver samtang nagapapanaog sang pasahero kag gindumdom niya nga magakabit ukon masakay man apang nakibot ini nga ginhabuyan sila sang balas kun sa diin naigo si Bombo Mia Mae Francisco nga nagapungko sa passenger seat.
Gintuyo pa nga bun-on sang suspect ang driver apang natapi sini ang kutsilyo kag gilayon man nga gintapakan ni Bombo Mia.
Bangud wala sang mga ini mabuno ang driver ginpakal nalang sang suspek sang bato ang driver kun sa diin nakaangkon ini sang samad sa baba.
Nagpanawagan man ini sa mga suspek nga magsungka na kag atubangon ang konsekwensya sang ila hinimuan.
