Patay ang isa ka driver sang motorsiklo matapos nga makuryente sang nagaluyloy nga live wire sa Montilla St., Barangay Montilla, Barangay 4, banwa sang Isabela, Negros Occidental.
Ginkilala ang biktima kay Rodolfo Parparan, 38-anyos, single, isa ka negosyante, kag pumuluyo sang Barangay 2, sa nasambit nga banwa.
Sa interview sang Bombo Radyo Bacolod kay Police Major Ellendie Rebusquillo, hepe sang Isabela Municipal Police Station, naglabay sa nasambit nga lugar ang isa ka trucking nga may karga nga tubo kag mahimo nga nasagaid ang linya sang kuryente kun sa diin nagasunod ang biktima nga nagadala sang motorsiklo ang nakuryente sang nagaluyloy nga linya sang kuryente.
Suno kay Rebusquillo, gintawag man nila ang atensyon sang Negros Occidental Electric Cooperative (NOCECO) bangud sa nagaluyloy nga linya sang kuryente.
Apang sang ginkadtuan sang katapo sang NOCECO natukiban nga ang linya sang kuryente ang iya sang Barangay Street light nga ginbutang sang barangay.
Gindala pa sa Isabela District Hospital ang biktima apang gindeklarar nga dead on arrival.
Sa karun ginahulat nalang ang desisyon sang pamilya sang biktima kag kun may yara ang mga ini sang pag-aregluhanay sang Barangay.
Samtang ang nagaluyloy nga linya sang kuryente ang ginkay-o na sang NOCECO agud wala na sang makuryente pa kag safe na ang magalabay didto.
