Magapangatubang sang sampaw-sampaw nga kaso ang motorcycle rider nga imbulbado sa road rage incident sa national highway sang Purok Bernabe, Barangay Salvacion sa banwa sang Murcia, Negros Occidental sang Domingo, Marso 8.
Ginkilala ang biktima nga si alyas Luisito, 67 anyos, anay Association of Barangay Captains (ABC) President kag anay miyembro sang Sangguniang Bayan sang banwa sang Murcia samtang ang suspek amo si alyas Patrick kag residente sang Barangay Patag, Silay City.
Sa imbestigasyon sang kapulisan, ang rider ang nag-overtake kag nagbalabag sa alagyan sang senior citizen nga driver antes ini nagpanaog kag nagpanumbag.
Nakaangkon sang pilas sa guya ang biktima.
Nagpangayo man sang pasaylo ang rider apang gin-file sagihapon sang senior citizen ang reklamo batok diri.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, nakahunong sa gihapon sa Murcia police station ang suspek kag napasakaan na sang kas nga ginalakipan sang serious physical injury, death threats kag maliscious mischief.
Suno kay Labaro ang suspek ang gindagdagan man sang Land Transportation Office sang show cause order.
Suno sa hepe, mahimo nga masabat sang suspek ang show cause order sa tion nga makagwa ini pananglitan nga makapiyansa.
