Patay ang isa ka driver matapos nga nagbunggua-nay ang ginadrive nga motorsiklo kag ang isa ka pribado nga salakyan sa intersection sang Lacson-Luzuriaga Street, Barangay 37, Bacolod City sang Martes, Pebrero 18.
Sa interview sang Bombo Radyo Bacolod kay Police Lt. Col. Ramel Sarona, pinuno sang Traffic Management Unit sang Bacolod City Police Office, ang imbulbado sa aksidente ang itom nga Honda CBF nga motorsiklo nga may plate number nga EN-7091 nga ginamaneho sang wala pa makilal-an nga persona, kag Nissan Patrol car.
Suno kay Sarona ang motorsiklo ang nagikan sa West padulong East nga direksyon samtang ang nabungguan sini nga Nissan Patrol ang nagabiyahe sa North to South nga direksyon apang sang pag-abot sa lugar sang aksidente nagbungguanay ang mga ini.
Ginalantaw nga madasig ang pagpadalagan sang mga ini kun sa diin nagluntad ang aksidente.
Bangud sa impact natumba ang motorsiklo kun sa diin ginhingagaw dala sa ospital ang driver sang motorsiklo kag ang angkas sini apang ang driver ang ginbawian sang kabuhi kag ang angkas ang padayon pa nga ginabulong kag tubtob sa karun nagapabilin nga unconscious.
Wala pa sang identity ang napatay nga driver sang motorsiklo kag ang angkas sini bangud wala ang mga ini sang dala nga mga identification cards.
Ang napatay nga driver ang nakasuksok sang itom nga panapton kag blue nga shorts.
Temporaryo naman nga ginkustodiya sa Bacolod Police Station 1 ang driver sang salakyan.
Nagapanawagan si Sarona sa publiko nga kun sin-o ang may himata nga wala pa makapauli tubtob sa karun ang magapakig-angot sa kapulisan agud nga matumod ang nagtaliwan kag nasamaran sa nasambit nga aksidente.
