Patay ang driver sang motorsiklo samtang pilason naman ang backrider sini matapos makabunggo sa sugata nga pickup sa Bangga CEGASCO, Barangay Pahanocoy, Bacolod City alas-10:30 kagab-i.
Sa interview sang Bombo Radyo Bacolod kay Police Captain Melvin Mercado, station commander sa Bacolod Police Station 8, ang biktima nga napatay ang isa ka 45 anyos nga lalaki nga residente sa Purok Roadside, Barangay Alijis, apang wala na sini ginbuyagyag pa sa kahanginan bangod sa hingyo sang pamilya.
Sa imbestigasyon, ang Toyora Hilux Pickup ang nagabyahe gikan sa East padulong sa West nga dereksyon, samtang sugata naman sini ang motorsiklo.
Apang hinali nga nag-agaw sang lane ang motorsiklo, kag sang ini ang ginlikawan sang pickup, nagbalik man ini sa nagakadapat nga lane.// Apang bangod sini sila ang naghead-on collission.
Bangod sa impact, dead on the spot ang driver sa motorsiklo samtang pilason naman ang backrider sini nga nakaangkon sang samad sa nagkalainlain nga bahin sang lawas.
Gilayon nga gindetain sa Bacolod Police Station 8 ang driver sang pickup, nga isa ka family driver samtang may-ara na sang inisyal nga pag-estoryahanay sa bahin sang duha ka pamilya.
Ginahulat pa sang kapulisan kun magapasaka sang kaso ang pamilya sang mga biktima ukon ini ang ipaagi na lamang sa settlement.
Ginapahayag nga ang duha ka biktima ang gikan sa isa ka ilimnan, apang wala pa matumod kun sila ang hubog.
