Patay ang driver sang motorsiklo matapos aksidente nga nakabunggo sa truck sa Sitio Cadulonan, Brgy. Cambaog, Hinigaran, Negros Occidental alas-12:40 kahapon sang kaagahon, Marso 24.
Ginkilala ang biktima nga si Steven Dela Cruz, 31-anyos, wala sang asawa, resident sang Prk Begonia, Brgy. Miranda sa banwa sang Pontevedra samtang ang driver sang truck amo si Armando Ibañez, 43-anyos, kasado kag residente sang Victorias City.
Sa inisyal nga impormasyon, ang motorsiklo kag truck ang nagabiyahe halin sa Hinigaran padulong sa Pontevedra.
Aksidente nga nabungguan ni Dela Cruz ang likod nga bahin sang truck rason nga siya ang nagtabog kag nakaagom sang pilas sa bahin sang iya ulo.
Gilayon nga gindala ang biktima sa Hinigaran Medical Clinic apang gindeklarar nga dead on arrival.
Samtang, ang driver sang truck ang yara na sa kustodiya sang Hinigaran Municipal Police Station para sa nagakaigo nga disposisyon kag imbestigasyon.
