Patay ang isa ka motorcycle rider matapos makabunggo sa duha ka salakyan sa CL Ledesma Avenue, Brgy. 1, San Carlos City, Negros Occidental.
Sa interview sang Bombo Radyo Bacolod kay Police Lt. Col. Nazer Canja, hepe sang San Carlos City Police Station, nabaton naman sang pamilya ang natabo bangud santo sa resulta sang imbestigasyon sang traffic investigator nakita nga ang ila himata ang may sala sa nagluntad nga aksidente.
Santo sa resulta sang traffic investigation, ang vehicle 1 nga isa ka Honda RS 125 nga motorsiklo nga ginamaneho sang biktima nga si Molito Apurado, 57 anyos, lalaki, kasado kag residente sang Purok Kamagong 2, Brgy. 1, San Carlos City, Negros Occidental ang hinali lang nagbunggo sa Vehicle 2 nga Kia Bongo pick up truck nga ginamaneho ni Francis John Ramos, 44 anyos, kasado kag residente sang Ilang-ilang St., Brgy. 2, San Carlos City samtang naga-overtake.
Samtang ginbungguan man sang Vehicle 1 ang Vehicle 3, isa ka Blue Ford Ecosport nga ginamaneho ni Inocentes Broce, 72 anyos kaso kag residnte sang Don Juan Subdivision, Brgy. 5, San Carlos City, Negros Occidental.
Gindala pa sang mga rescuer sa ospital ang biktima apang wala na matabangan pa matapos gindeklarar nga dead on arrival.
Panugyan ni Canja nga dapat iobserbar sang mga motorista ang defensive driving agud nga malikawan ang insidente.
