Patay ang driver sang motorsiklo samtang pilason naman ang isa pa matapos mabungguan sang magaliko kuntani sa Barangay Bagtic, Silay City alas-11:40 kahapon sang aga.
Ang napatay ang ginkilala nga si Bartolome Villadar, residente sang Brgy Maitom, Escalante City samtang ang nakabunggo amo si Joenel Ortinez, 49 anyos, residente sang Zone 1, Brgy Mambulac, Silay City, Negros Occidental.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, si Villadar nga nagamaneho sang Rusi TC 125 ang nagabyahe gikan sa Talisay City padulong sa banwa sang EB Magalona samtang nagasunod naman sa likod sini ang Yamaha NMAX nga ginamaneho ni Ortinez.
Apang pagdangat sa lugar sang insidente, si Villadar ang nagliko pa wala padulong sa isa ka bangga kag ini ang nabungguan ni Ortinez.
Ang duha ang lunsay natumba sa semento nga dalan kun sa diin si Villadar ang nakaangkon sang head injury samtang si Ortinez ang nasamaran naman sa nawala nga abaga.
Gindala pa sa ospital ang mga biktima apang sang hapon, ginbawian sang kabuhi si Villadar.
Sa karun ginahulat pa ang resulta sang paghinun-anon sang duha ka pamilya, kun may magapasaka sang kaso ukon ipaagi na lamang sa settlement.
