Patay ang 27 anyos nga lalaki nga driver sang motorsiklo sa aksidente nga nagluntad sa Alijis Road, Barangay Alijis, Bacolod City kahapon sang kaagahon.
Ang biktima ang residente sang Barangay Handumanan samtang ang driver naman sang Hilux nga salakyan ang 23 anyos kag residente sang Barangay Villamonte.
Sa interview sang Bombo Radyo Bacolod kay Barangay Kagawad Rommel Exanes sang Barangay Handumanan, Bacolod City, nalabayan sini ang aksidente kun sa diin nakita niya ang amay sang biktima nga abyan sini ang nagresponde.
Suno kay Exanes, wala sini naabtan ang bangkay bangud ginhingagaw man ini dala sa punerarya.
Sa iya pagpangusisa, yara sa insakto nga lane ang motorsiklo samtang ang salakyan ang nag-awas sa piyak nga lane.
Nabungguan sini ang biktima kun sa diin nagsuhot gid sa idalom sang salakyan kag nag-agom sang mga samad nga rason sang iya nga kamatayon.
Bangud sa impact, wasak ang atubang sang salakyan samtang ang motorsiklo ang may dako man nga damage.
Suno kay Exanes, ang Alijis Road ang bag-o kag wala pa sang markings ang middle lane rason nga kun kaisa indi malikawan nga ang salakyan ang nagaawas sa lane.
Sa karun yara sa paghinakop sang Bacolod Police Station 7 ang driver sang salakyan.
