Dead on the spot ang isa ka lalaki matapos maaksidente sa bangga Guanzon, Brgy Mansilingan, ciudad sang Bacolod, kagab-i.
Ang biktima ang ginkilala nga si Anthony Aguas, naga-edad sang kapin 40 anyos, kag residente sang Brgy Vista Alegre, Bacolod City.
Suno sa mga nakakita, madasig ang pagpadalagan ni Aguas sang iya motorsiklo kag nag-over take ini sa nagabaligya sang mani nga nagamaneho sang tricycle apang nagsangit ini sa tanker truck.
Sa interview sang Bombo Radyo kay Police Staff Sergeant Joel Casaig, traffic investigator sang Bacolod Police Station 7, dead on the spot si Aguas sang napurohan ang iya ulo dugang pa nga wala man ginasuksok sang biktima ang iya helmet.
Sa karun ang driver sang tanker truck ang yara sa kustodiya sang Bacolod Police Station 7.
Samtang suno naman kay George Launio, bayaw sang biktima, nagabyahe si Aguas halin sa Brgy Tangub kag masami man nagalabay sa Brgy Mansilingan kun papauli ini halin sa trabaho.
Pahayag ni Launio, may yara sang asawa kag bata si Aguas kag sa karun nagabusong pa ang asawa sini.
