Ginbawian sang kabuhi ang driver sang motorsiklo nga nagbunggo sa likod sang SUV sa dalan Araneta sa bangga sang Akina Village Subdivision, Barangay Tangub sa syudad sang Bacolod kahapon sang hapon.
Sa interview sang Bombo Radyo Bacolod kay Chricel Yuro, 19 years old kag driver sang Toyota Innova, nagikan siya sa banwa sang Pulupandan kag ginhapit ang kaupod sini nga si Natasha Sun (Soon), 19 anyos nga residente sang Barangay Taloc, Bago City, Negros Occidental.
Paliko ang mga ini sa bangga Akina Village bangud may sugaton apang nakibot na lamang sila nga may nagbunggo sa likod sang ila salakyan.
Suno kay Yuro, nagsignal man sila antes nagliko kag maayo lang nga nakapreno man siya gilayon.
Suno kay Sun wala man sila gilayon nagpanaug bangud nashock apang sang nagpanaug sila nakita sang mga ini nga nagahingalo na ang driver sang motorsiklo kag nagtawag man sila sang bulig agud madala sa ospital.
Samtang nakaagum man si Sun sang minor injuries bangud sa impact.
Gindala sa South Bacolod General Hospital & Medical Center Inc. ang mga biktima nga sanday Thomas Ginadalanga Jr., 28 anyos, driver sang motorsiklo kag Beverly Pilongo, 26 anyos.
Gintinguhaan pa nga salbaron si Gidalanga apang ginbawian sang kabuhi.
Samtang yara naman sa maayo nga kahimtangan si Pilongo.
Padulong kuntani sa Punta Taytay ang maglive-in partner agud magtambong sang kaadlawan sang amay ni Gidalanga sang nakasugata sang aksidente.
Suno kay Corazon Gidalanga, iloy ni Thomas Gidalanga, ginpahibalo sila sang ospital sa natabo sa biktima.
Gilayon naman nga nagpadulong sa ospital ang iloy sang biktima.
Si Gidalanga ang may walo katuig nga anak sa una nga asawa.
Ginpahayag man sang bayaw ni Gidalanga sa una nga asawa nga ginahulat pa nila ini sa Punta Taytay agud makaupod sa pagselebrar sang kaadlawan sang iya amay.
