Patay ang 19 anyos nga driver sang motorsiklo matapos magbunggu-anay sa trailer truck sa intersection sang Bacolod-Negros Occidental Economic Highway (BANOCEH) sa sakop sang Brgy Felisa, Bacolod City alas-9:45 kagab-i.
Ang pula nga Rusi TC Macho 125 nga motorsiklo nga ginamaneho ni Alyas Justine, 19 anyos, residente sang Totong 4, Brgy Felisa, Bacolod City.
Samtang ang driver sang Trailer Truck Prime Mover ang ginkilala naman nga si Alyas Manie, 41 anyos, residente sang Brgy Poblacion 1, Sagay City.
Sa interview sang Bombo Radyo Bacolod kay Police Major Elmer Bonilla, head sang Bacolod City Traffic Enforcement Unit, ang motorsiklo ang nagabyahe sa south to north direction samtang ang truck ang nagabyahe naman sa west to east direction.
Ang lugar ang madulom dugang pa nga naga-ula, samtang may-ara pa sang mga kahoy kag katubuhan nga nagatabon sa dalan, nga ginalantaw rasun kun ngaa natabo ang head-on collision.
Bangod sa kabaskog sang impact, nag-agom sang patal nga head injury ang driver sang motorsiklo kag ginbawian sang kabuhi.
Ang driver ang gilayon man nga nagsungka sa Bacolod Police Station 10.
Napahibalo naman ang pamilya sang biktima, kag sa karun ginahulat pa kun sila ang magapasaka sang kaso.
