Patay ang driver sang motorsiklo matapos magsungay sa Ceres bus sa National Highway sang Barangay Bonawon, sa banwa sang Siaton, Negros Oriental alas-3:50 kahapon sang hapon.
Ang biktima ang ginkilala nga si Alyas Don Don, 38 anyos, residente sang Barangay Sulodpan, Bacong, Negros Oriental.
Sa imbestigasyon sang Siaton Municipal Police Station, ang Ceres bus ang nagabyahe padulong sa Dumaguete City samtang padulong naman sa opposite direction ang motorsiklo.
Gina-alegar nga nabungguan ni Don Don ang ido nga hinali nagtabok sa dalan rasun nga nagwarik ang iya motorsiklo kag naglapaw sa pihak nga lane.
Didto na ini nagsampok sa Ceres bus kun sa diin naglabog si Don Don kag naglampos sa windshield sang salakyan.
Gindala pa ang biktima sa pinakamalapit nga ospital apang gindeklarar nga dead on arrival.
