Patay ang 18-anyos nga lalaki nga nagasakay sa motorsiklo matapos sini nabungguan ang duha ka mga persona nga nagalakat sa Sitio Cabug, Barangay Santol, banwa sang Binalbagan.
Suno kay Police Major Ellendie Rebusquillo, hepe sang Binalbagan Municipal Police Station, natabo ang aksidente alas 7:00 sang Domingo sang gab-i apang alas 11:40 na ini nareport.
Suno kay Rebusquillo, wala ini gilayon nga narespondehan bangud madulom ang lugar kag nakadtuan na lamang sang mga kapulisan pagkaaga.
Santo sa pahayag sang mga residente, mahinay ang pagpadalagan ni Judy Apolinario, 18-anyos, residente sang Barangay Cansalungon, Isabela, sang iya motorsiklo apang medyo buron na ang headlight sini.
Padulong na ini kuntani sa highway sang na sidesweep sini si Jude Labar nga nagalabay sa dalan kaupod si Jester Labar, lunsay mga menor-de-edad.
Pagkabunggo sini, siya ang nagtabog nagikan sa iya motorsiklo kag naigo sa ulo.
Bangud sa patal ang naagum sini nga pilas, siya ang nadulaan gid sang kabuhi.
Nakaangkon naman sang minor injuries kag malayo sa katalagman sanday Jude kag Jester Labar.
Suno sa hepe, indi hubog kag wala sa impluwensya sang alcohol si Apolinario.
