Patay ang driver sang motorsiklo matapos aksidente nga nakabunggo sa nakapark nga truck nga may karga nga tubo sa National Road sa Hacienda Reboton, Barangay Tinampa-an, Cadiz City.
Ang biktima ang ginkilala nga si Alyas Norman, 40 anyos, single, laborer, residente sang Purok Gracia, Barangay Magsaysay, Cadiz City kag nagamaneho sang Rusi Macho nga motorsiklo.
Samtang wala naman nahibaluan kun sin-o ang driver sang Mitsubishi Fuso Truck nga may karga nga tubo.
Sa inisyal ng imbestigasyon, yara na ngadaan sa kilid sang dalan ang truck bangod nagub-an sang makina, apang wala sang warning devices.
Samtang papauli, aksidente nga nabungguan ni Norman ang truck samtang nalampos naman sa simintado nga dalan ang biktima nga nag-angkon sang injuries sa nanarisari nga bahin sang lawas.
Gindala pa sa Cadiz District Hospital ang biktima, apang ini ang gindeklarar nga Dead on Arrival.
