Patay ang driver sang motorsiklo matapos nakabunggo sa tricycle sang nag-overtake ini sa kotse sa dalan Lacson, Barangay Mandalagan, ciudad sang Bacolod kaina sang kaagahon.
Ginkilala ang biktima nga si Fritz Santaromana, 35 anyos, temporaryo nga nagapuyo ukon nagaboard sa Barangay 18, ciudad sang Bacolod apang tumandok sang probinsya sang Antique.
Ang driver sang tricycle nga nabungguan sang biktima amo si Renito Baliong, 48 anyos kag residente sang Purok Tuboran, Barangay Mandalagan, ciudad sang Bacolod samtang sakay man sa tricycle ang asawa ni Baliong nga si Mary Rose Baliong, 42 anyos kaupod ang bayaw sini nga si Evelyn Ebon, 51 anyos
Padayon nga ginabulong sa Corazon Locsin Montelibano Memorial Regional Hospital ang duha ka sakay sang tricycle matapos nga nakaagom sang samad tuga sang aksidente.
Suno kay Baliong, nagamaneho ang driver sang motorsiklo padulong sa sur nga bahin samtang siya naman ang nagamaneho sang tricycle padulong sa norte nga bahin kun sa diin ang si Santaromana ang nag-overtake sa isa ka auto.
Apang sang nakasaylo sa nawala nga lane si Santaromana matapos nga magovertake, wala na sini natalupangdan nga nagapadulong ang tricycle nga ginamaneho ni Baliong gani nagluntad ang aksidente nga nagresulta sa kamatayon sini.
Bangud sa impact nabuka ang windshield sa atubang nga pulungkuan sang tricycle.
Ginakasubo kag nasakitan man si Baliong ang natabo apang ang aksidente indi man mapaktan kag nagapangayo man ini sang pasyente para sa pamilya sang biktima nga napatay bangud sa natabo nga wala man niya ginhungod.
Yara sa Bacolod Police Station 3 si Baliong sa karun kasubong man ang tricycle nga ginamaneho sini nga ginakargahan sang ila ginkumpra para sa ila negosyo nga ginakuhaan sang ila palangabuhian.
Padayon ang imbestigasyon sang mga kapulisan sa insidente samtang ang biktima ang gindala naman sa punerarya sa ciudad sang Bacolod.
