Patay ang motorcycle rider matapos nga makabunggo sa nagapark nga truck sa Circumferential Road, Purok Pine Tree, Brgy. Bata, syudad sang Bacolod kahapon sang kaagahon.
Ginkilala ang biktima kay Jefferson De Costa, 28 anyos, kag residente sang Brgy. Bato, syudad sang Sagay kag temporaryo nga nagatinir sa 4th Road Fortune Town. Brgy. Estefania, syudad sang Bacolod.
Sa interview sang Bombo Radyo Bacolod kay Police Capt. Armilyn Vargas, station commander sang Bacolod Police Station 3, nagpundo ang truck bangud nagkaon ang driver sang nabungguan sang nagbunggo diri ang motorsiklo ni De Costa.
Wala man sang ginbutang ang truck sang early warning device kag wala man sang signal nga nagapundo ang salakyan gani nabungguan sang motorsiklo.
Nakaagom ang biktima sang mga samad sa nagkalain-lain nga lawas nga gintunaan sang iya kamatayon.
Ginpahayag ni Vargas nga indi man madulom ang lugar bangud kun kaisa dira man sila nagapwesto para sa checkpoint.
Nakahunong na ang driver sang truck nga si Alfredo Cosi, 28 anyos kag residente sang Purok Andan Zone 3 Pepsi, Brgy. Bata kag ginabanta nga makagwa sa Martes.
May inisyal naman nga istoryahanay ang magtimbang nga bahin apang wala pa sila sang final nga settlement.
