Patay ang driver sang police car sa syudad sang Escalante, Negros Occidental matapos gintiro sang armado nga mga tawo sa Sitio Buenavista, Barangay Malasibog, Escalante City.
Sa interview sang Bombo Radyo Bacolod kay Police Major Gil John Despi, hepe sang Escalante City Police Station, gintawag sang kapin napulo ka tawo ang biktima nga ginkilala kay Argie Buenavista, 33 anyos kag residente sang nasambit nga lugar samtang yara ini sa ila balay kaupod ang anak sini gani naggwa man ini gilayon kag sang nakita nga armado ang mga nagtawag sa iya, nagdalagan ini apang siya ang gintiro kag naigo sa lawas kag sa ulo.
Narekober sa crime scene ang bala sang M-16 kag .45 caliber pistol.
Suno kay Despi, wala sang nahibaluan nga kontra sang biktima bangud vocal man ini kag mabuot rason man nga nagpasugot ini nga kuhaon nga driver sang patrol car.
Suno diri, nag-ayo siya sa Local Government Unit (LGU) sang Escalante City nga hatagan sang driver bangud masami sila nga masako gani ang biktima ang ginhatag sa ila kag empleyado man sang syudad.
Wala man nadalahig ang anak sang biktima kag wala pa matumod kun katapo sang New People’s Army (NPA) ang nagtiro kag nagransack sa balay sang biktima.
Sa karun, nagapadayon pa ang imbestigasyon kag nagalaom man si Despi nga may makuha sila nga lead agud matumod ang may kahimuan sa biktima.
