Napasakaan na sang kaso ang driver sang salakyan nga nadakpan nga may karga nga smuggled nga sigarilyo matapos nga nagpalagas sa checkpoint sa National Highway, Rafael Salas Drive, Barangay Balingasag, Bago City, Negros Occidental, sang Mayo 21 sang kaagahon.
Sa interview sang Bombo Radyo Bacolod kay Police Lt Col James Latayon Jr, Chief of Police sang Bago City Police Station, napasakaan na sang kaso ang mga nadakpan apang ang babayi ang wala napasakaan sang kaso bangud nakita sang fiscal nga wala nadala ang babayi bangud ang kaso nga ginpasakaan ang disobedience to person in authority matapos nga nagpalagas ini sa mga kapulisan sa Checkpoint.
Suno kay Latayon, ang kaso may kaangtanan sa illicit cigarettes ang yara pa sa case build-up.
Suno diri, ipaagi sa regular filing ang kaso may kaangtan sa sigarilyo.
Ang lalaki ang nakahunong sa Bago City Police Station.
Madumduman nga dakop ang isa ka lalaki kag babayi matapos makuhaan sang 23 ka kahon sang illicit cigarettes nga nagabalor sang kapin P380,000 sa checkpoint sa National Highway, Rafael Salas Drive, Barangay Balingasag, Bago City, Negros Occidental sang Mayo 2.
Ang lalaki nga nadakpan ang naga-edad sang 30, samtang ang babayi naman naga-edad sang 31, lunsay mga Muslim kag residente sang Purok Magnolia, Barangay San Vicente, Binalbagan, Negros Occidental.
Sa inisyal nga imbestigasyon, ang Toyota Revo nga ginasakyan sang duha nagabyahe sa dereksyon nga gikan sa Bacolod City.
Sang papalapit na sa checkpoint, madasig nga naglikaw ang salakyan kag nagtuyo nga malagyo apang naaresto ang duha sa hot pursuit operation.
Sa pagtsekyar sang kapulisan wala sang may napakita nga valid driver’s license ang lalaki kag nakit-an ang pila ka mga kahon sang ginpapanaog sang lalaki ang bintana.
