Dismayado kag wala na sang mahimo ang driver sang traditional jeepney matapos nga ginkanselar ang natalana nga pagpatuman sang fare increase subong nga adlaw.
Gani ginapanawagan na lamang sini nga padasigon ang paghatag sang fuel subsidy.
Sa interview sang Bombo Radyo Bacolod kay Decel Pioquinto, wala na ini sang mahimo sa kun ano ang desisyon sa ibabaw, apang aminado ini nga masakit ang pagkanselar sang fare hike.
Suno diri, P750 ang iya nga ginabayaran nga boundary, samtang ang dako nga bahin sang pletehan ang nagakadto lamang sa gatong, bangod sa tuman nga pagtimbook sang presyo sang Diesel.
Suno kay Decel, nagakadto pa sa Diesel ang kuntani income na para sa iya nga pamilya.
Bangod gamay nalang ang mabilin sa ila, ini ang ila na lamang nga ginapa-igo igo.
Suno diri, dako man kuntani nga bulig ang fuel subsidy apang kwestyon pa kun san-o ini magatupa.
Panawagan ni Decel, nga kun wala gid man sang ipatuman nga fare increase, kuntani padasigon sang gobyerno ang paghatag sang fuel subsidy.
Si Decel ang tumandok sa Romblon apang nakapangasawa sa Bacolod City, kag 15 ka tuig na nga jeepney driver.
Ini ang wala man sang iban nga palangitan-an luwas sa pagdrive sang jeep.
Sila ang may lima ka kabataan kag ang agot ang Grade 7 pa lamang.
Panawagan niya nga tamdon ang mga public utility drivers, nga una nga naapektuhan sa tuman nga pagsaka sang presyo sang gatong.
