Patay ang driver sang tricycle matapos makaaksidente sa Negros South Road, Barangay Crossing Pulupandan, Pulupandan, Negros Occidental sang Hulyo 18.
Ginkilala ang napatay kay Darry Nanalave, kasado, 53 anyos, driver sang tricycle apang wala sang drivers license kag resident sang Purok Tundo, Barangay Mabini, Valladolid, Negros Occidental.
Sa interview sang Bombo Radyo Bacolod kay Police Staff Sgt Rodel Barayoga, traffic investigator sang Pulupandan Municipal Police Station, sa panaysayon sang witness nga si alias Jusedna, nakita niya ang motorsiklo nga nagabiyahe halin sa Hinigaran padulong sa Bago City apang sang pag-abot sini sa Negros South Road, Barangay Crossing Pulupandan hinali lang nagtabok ang tricycle rason nga nabungguan sini ang motorsiklo.
Bangud sa mabaskog nga impact nagtabog ang mga driver kag nakaangkon sang madamo nga samad.
Gindala ang mga ini sang responding personnel sang Pulupandan Municipal Disaster Risk Reduction and Management Office (MDRRMO) sa Valladolid District Hospital.
Lunsay conscious kag responsive ang duha samtang ginabiyahe padulong sa ospital apang sang alas 10:24 ang takna sang gab-i, gindeklarar ang driver sang tricycle nga napatay.
Ang motorsiklo kag tricycle ang gindala sa Pulupandan Municipal Police Station para sa nagakaigo nga imbestigasyon kag disposition.
