Ginhilway na ang driver sang truck nga nagakarga sang tubo nga nabungguan sang sports car sa Homesite-Circumferential Road, Barangay Villamonte, ciudad sang Bacolod sang Martes sang kaagahon kun sa diin lunsay nagkalamatay ang tatlo nga sakay sa Ford Mustang.
Madumduman nga napatay ang driver nga si Stanley Flores, 40-anyos, residente sang Barangay Villamonte, kaupod ang abyan nga si Wilton Porcel kag hinablos ni Porcel nga si Mark Wiljohn sang Barangay Banago.
Idul-ong kuntani ni Flores ang abyan sa Barangay Banago matapos magtambong sa birthday party apang sila ang nakabunggo sa ginasundan nga truck nga ginamaneho ni Michael Mejica sang Barangay Tabugon, Kabankalan City, Negros Occidental.
Sa interview sang Bombo Radyo Bacolod kay Police Major Charles Gever, station commander sang Police Station 4, natapos na ang 18 ka oras nga reglementary period of detention gani ginbuy-an na si Michael Mejica.
Suno diri, may yara naman sang inisyal nga istoryahanay ang tag-iya sang truck kag pamilya sang tatlo ka mga biktima.
Ginpahayag man ni Gever nga santo sa ginpasa nga affidavit of non-interest, mahimo na maconclude nga indi na magpasaka sang kaso ang pamilya sang mga biktima.
Hulaton naman lang ang final nga resulta sang estoryahanay sang duha ka kampo.
