Nakagwa na sa prisuhan ang driver sang ten-wheeler truck nga naglasak sa 11-anyos nga apa kag bungol sa reclamation area sang Bacolod, Miyerkules sang hapon.
Suno sa station commander sang Police Station 1 nga si Police Major Jovil Sedel, nag-lapse na kaina sang aga ang reglementary period of detention ni Reagan Requiron sang Barangay Andres Bonifacio, Sagay City rason nga ini ang ginhilway.
Kahapon, nag-istorya naman sila sang pamilya sang biktima kag nagkasugot nga sabton sini ang gasto sa pagpalubong sa bata gani wala na nagpasaka sang kaso ang pamilya ni Christian Sabillo sang Purok Boulevard, Barangay 14.
Sa interview sang Bombo Radyo kay Requiron, ginkasubo sini ang natabo.
Una ini nga nagpark sang truck sa ginluntaran sang aksidente apang nagsaylo siya malapit sa bodega nga dul-ungan sang 500 ka sako sang kalamay nga nagikan sa Sagay.
Nagapangape ini sang may nagpahibalo nga may nalapakan nga bata sa lugar nga iya ginparkingan gani gilayon siya nga nagpadulong sa lugar kag nakit-an ang bangkay.
Suno kay Requiron, wala niya nakit-an ang bata nga yara sa likod sang truck.
Wala man niya nabatyagan nga may nalasakan ini bangud mabug-at ang karga sang truck.// Kagab-i, wala nakakaon ang driver bangud indi ini maributay sa natabo.
