Patay ang driver sang truck matapos ginluthang sang wala makilal-an nga persona sa Purok Star Apple, Sitio Canubgan, Barangay Bandilo, banwa sang Toboso.
Suno kay Police Lt. Reneboy Eduardo, deputy chief of police sang Toboso Municipal Police Station, ginkilala ang biktima kay Raymond Ulgasan, 30 anyos, isa ka driver, residente sang Brgy. Winaswasan, Calatrava, Negros Occidental.
Suno kay Eduardo, indi si Ulgasan ang nagadrive sang truck nga may karga nga nga mga materyales sa paghimo sang balay bangud yara ini sa likod nagasakay kag ang iya helper nga si Jek-jek Dela Cruz amu ang nagadrive.
Suno diri, ginpapondo sang mga wala pa makilal-an nga suspetsado ang salakyan kag hinali lamang nga ginpaarakan sang luthang si Ulgasan.
Naigo ini sa nagkalain-lain nga bahin sang iya lawas nga gintunaan sang iya kamatayon.
Wala naman nakit-an sang driver ang nawong sang mga suspetsado bangud madulom ang lugar kag ginflashlightan ang iya mata sang isa sa mga suspetsado.
Pagkatapos sang pagpangluthang, gilayon nga nagpalagyo ang mga suspetsado sa wala nahibaluan nga direksyon.
