Wala na sang kabuhi kag may igo sang bala sa ulo ang isa ka lalaki sang nasapwan ini sa sulod sang van sa Hacienda Manaol, Barangay Matab-ang, Talisay City kaina sang aga.
Suno kay Police Lt. Abegail Donasco, tagpamaba sang Talisay City Police Station, ang biktima ang ginkilala kay Brian Mark Agillo, 33-anyos, may live-in partner kag tatlo ka mga kabataan kag residente sang Hernaez Street, Brgy 36, Bacolod City.
Suno kay Donasco, nagpadulong sa balay ni Agillo ang investigator on case sang Talisay City Police Station kag didto gin-identify sang iya live-in partner nga si Sheena Espe Azucena ang identity sang biktima.
Suno kay Junior Donesa, chairman sang Citizen Crimewatch Talisay Chapter, sila ang nag-abot sa lugar alas 5:00 sang kaagahon.
Suno kay Donesa, posible nga ala 1:00 sang kaagahon natabo ang insidente.
Pag-abot nila sa lugar, wala sang igo sang bala ang van, bukas gamay ang slide door samtang sirado naman ang pertahan sa driver’s seat.// Suno kay Donasco, ini ang may igo sang bala sa natuo nga dulunggan kag may igo man malapit sa kilay.
Nakit-an naman ang baseho sang bala sa tupad lamang sang biktima.
Nahibaluan nga nagaparenta sang van si Agillo.
Wala ini sang dala nga driver’s license kaina sang kaagahon.
Indi pa klaro kun sa diin ini naghalin antes ginpatay sang suspetsado nga ginapatihan kaupod niya man sa sulod sang van.
Ginkakibot naman ni Councilor Israel Salanga, nga migo ni Agillo ang natabo sa biktima.
Sa interview sang Bombo Radyo kay Salanga, maninoy ini sa ikaduha kag lima ka tuig nga bata nga lalaki ni Agillo.
Suno kay Salanga, nagkitaay pa sila sang nagligad ni Agillo bangud siya ang nagtabo sang regalo sa iya nga ihado.
Nangin mag-abyanay ang mga ini paagi sa common friends kag siya ang ginafollow man ni Agillo sa social media.
Suno diri, madamo na sang ginsudlan nga trabaho ang biktima kasubong man sang negosyo agud sila ang makasurvive.
Mabuot kag wala sang gamo ang iya pagkakilala diri apang wala ini nakahibalo nga siya ang nagadrive sang van.
Wala man ini nakahibalo sang posible nga rason kun ngaa may naghimo sini sa biktima.
Naglaom ang konsehal nga mahatagan gilayon sang hustiya ang natabo bangud magagmay pa ang mga kabataan sini.
