Patay ang driver sang van sang simbahan matapos ginluthang sa gwa sang Bacolod Cosmopolitan Christian Church sa Brgy Taculing, Bacolod City, kaina sang aga.
Suno kay Delbi Moises, nagatrabaho sa simbahan, ang biktima amo si Efren Banaglorioso nga residente sang Brgy Granada.
Suno diri, sang malapit na matapos ang misa, may nabatian siya nga apat tubtob sa anum ka lupok kag sang gintskeyar sini sa gwa sang simbahan didto niya nakit-an nga may tawo nga natumba.
Si Banaglorioso nag-agom sang pilas sa ulo nga gintunaan sang iya gilayon nga kamatayon.
Pahayag ni Moises, masobra sa 30 ka tuig na nga nagatrabaho si Banaglorioso sa simbahan kag siya may yara sang lima ka kabataan.
Samtang padayon pa ang imbestigasyon sang Bacolod Police Station 6 ang pagluthang patay sa driver sang Cosmopolitan Christian Church sa Brgy.Taculing, Bacolod City kahapon sang aga.
Ginkilala ang biktima kay Efren Banaglorioso, 59 anyos kag residente sang Brgy.Granada, Bacolod City.
Sa interview sang Bombo Radyo Bacolod kay Police Captain Rosalino Pugoy Jr, station commander sang Bacolod Police Station 6, duha ang inisyal nga ginalantaw nga suspek sa pagpatay kay Banaglorioso bangud ang gun man ang nagikan sa passenger side sang itom nga pick-up truck kag may kaupod nga driver.
Suno kay Pugoy, gina-establisyar pa ang motibo sa pagpatay sa biktima bangud suno sa mga nainterview sang mga ini nga wala man ini sang kontra sa iya nga ginatrabahuan.
Ang biktima ang nakaagom sang pilas sa ulo, dulunggan kag sa likod nga gintunaan sang kamatayon sini.
Narecover sa lugar ang anum ka mga basiyo sang bala.
Gintsekyar man sang mga kapulisan kun may yara sang CCTV sa lugar agud nga makabulig sa imbestigasyon sa krimen.
Sa karun, ginaverify pa sang Bacolod Police Station 6 ang background sang biktima kag mga aktibidad sini agud nga matumod ang motibo sa pagpatay diri.
