“Self Destructive” suno sa abogado ang ginhimo ni Senator Imee Marcos nga pagpagwa sang statement tuhoy sa paggamit sang illegal nga droga sang iya manghod, nga si Presidente Ferdinand “Bongbong” Marcos Jr.
Sa interview sang Bombo Radyo Bacolod kay former Councilor Atty Renecito Novero, ginkakibot sini ang hinali nga rebelasyon sa atubang sang publiko.
Apang nagapati ang abogado nga kaangay sa reaksyon sang madamo, makonsiderar nga bastos, inconsiderate kag self destructive ang ginhimo sang magulang nga Marcos.
Ang bastos nga aktwasyon man ni Senator Imee ang ginalantaw ni Novero nga rasun kun ngaa gin-untat sa ikaduha nga adlaw ang kuntani 3-day rally for transparency sang Iglesia Ni Cristo
Ini bangod ang ila nga non-political rally ang nahigkuan sang mga pahayag sang Senadora.
Suno kay Novero, kuntani wala na lamang ginpahanugutan nga makahambal si Senator Imee bangod umpisa palang, ini ang nagapagwa na sang malain nga mga sentimyento batok sa iya manghod.
Dugang pa sang abogado nga kun nahibaluan na sang Senadora nga nagadroga si Presidente Marcos halin sang ini ang lamharon pa, ang pagtugot sini nga mangin Presidente ang manghod ang kaangay nga hungod nga pagbutang sang Pilipinas sa pagkaguba.
Wala man ginadula sang abogado ang posibilidad nga nagagamit gid man sang illegal nga droga si Marcos sang lamharon pa, nga common sa madamo nga mga elite nga pamilya, kag mangin si Imee ang mahimo nga nagagamit man sadto.
Apang sa karun sa paglantaw sini sa hulag, aktwasyon kag paghambal sang Presidente, nagapati ini nga indi matuod ang alegasyon sang Presidential sister nga ini ang tuman na ka lolong sa droga.
Bilang naga-akusar, yara naman kay Senator Imee ang responsibilidad nga pamatud-an ang iya mga alegasyon.
Sa ginhimo ni Imee, siya ang sarang makasuhan sang inciting to sedition kag libel, apang nagapati ang abogado nga indi na ini pagpatulan sang Presidente.
Mas ma-apresyar man ang Presidente kun ini ang magahipos na lamang.
Samtang masakit man para kay Senator Imee kag mangin kay Vice President Sara Duterte nga makita nga apisar sa mga pasabog, si Presidente Marcos ang kaangay nga wala sang nabatian, wala may nakita, kag wala sang labot, nga padayun lamang sa paglibot kag paghatag sang serbisyo.
