Nagdangat na sa 228 ka mga barangay sa Negros Occidental ang nadeklarar bilang drug-cleared barangays matapos nga nadugangan sang 21 ka mga barangay sa ginpatigayon nga deliberasyon sang Regional Oversight Committee nagligad nga Huwebes.
Sa interview sang Bombo Radyo Bacolod kay Philippine Drug Enforcement Agency (PDEA) Negros Occidental head Nicholas Gomez, ginpahayag sini nga apat ka mga barangay nagikan sa Calatrava, duha sa Cauayan, tatlo sa Salvador Benedicto, duha sa La Castellana, tatlo sa Manapla kag tag-isa ka barangay sa EB Magalona, Isabela, San Carlos, Sipalay, Talisay, Valladolid kag Victorias ang nalakip sa mga barangay nga nagdugang sa mga drug-cleared sa probinsya.
Suno kay Gomez, masobra 40 ka mga barangay ang nagpasa sang application apang 26 lang ang nakalab-ot sa deliberasyon kag 21 lang ang nadeklarar nga drug-cleared.
Sa karon, 40% palang sang kabug-usan nga 601 barangays sa Negros Occidental ang hilway na sa iligal nga druga.
Nagalaom si Gomez nga madugangan pa ang numero sang mga barangay nga madrug-clear sa masunod nga deliberation nga patigayunon sa masunod nga bulan.
Samtang, ginakalipay naman sang Negros Occidental Police Provincial Office ang pagdugang sang 21 ka mga barangay sa probinsya nga nadeklarar bilang drug-cleared.
Suno kay P/Lt. Abegael Donasco, deputy spokesperson sang NOPPO, ginpahayag sini nga tuman gid ang ila kalipay ilabi na ni Provincial Director P/Col. Romy Palgue ang pagdugang sang pila ka mga barangay sa mga nahilway na sa iligal anga druga.
Nagpanawagan man ini sa iban nga mga barangay officials nga magsuporta sa drug clearing operation agud mas mapadasig ang pagdrug-cleared sa mga barangay.
Dugang pa sini nga mas manami nga may yara na sang pinakauna nga Balay Silangan sa Negros Occidental sa banwa sang Pulupandan.
Suno kay Donasco, dako ang mabulig sini agud nga mas madamo pa gid ang madrug-clear sa probinsya.
Ginalauman naman nga sa masunod nga tuig inagurahan ang Balay Silangan sa ciudad sang Himamaylan.
