Apat ka mga persona ang nadakop kalakip na ang drug den maintainer sa buybust operation nga ginpatigayon sang Philippine Drug Enforcement Agency (PDEA) sa Barangay Estefania, Bacolod City.
Sa interview sang Bombo Radyo kay Agent Bamboo, team leader sang PDEA Negros Occidental, ang subject sa buybust operation nga ginkilala nga si Marlon Treyes, 37 anyos, ang ginreport sa Isumbong mo kay Wilkens program sang PDEA national headquarters.
Matapos sang nabatun nga report, ila naman nga ginpadulungan ang lugar kag nagpatigayon sang surveillance kag monitoring sa suspetsado tubtob sa napamatud-an nga ini ang nagapagamit sang iligal nga droga sa nagaserbe nga drug den.
Paathag sini nga ginakabig street level individual si Treyes apang ini ang nangin prayority target bangod ang kumunidad mismo ang nagreport diri sa national office sang PDEA nga nagapakita lang sang pagkahangawa sang mga pumuluyo.
Samtang ang subject ang nagatrabaho naman sa isa ka vulcanizing shop bilang front, kun sa diin ini ang katupad lang sang nagaserbe nga rug den.
Suno kay Agent Bamboo, sa tion nga may mag-abot ini nga parokyano gilayon lang ang mga ini nga ginapasulod sa drug den agud nga makagamit sang ginadumilian nga droga kag nagabalik sa pagtrabaho sa bolkitan.
Sa karun ginatumod pa sang PDEA Negros Occidental kun yara sa listahan sang mga nagsurrenderee sa tokhang sadto ang suspetsado kag kun ini ang nakaschedule sa Barangay Community Rehabilitation Program.
Paathag ni Agent Bamboo nga may Community Rehabilitation Program sa Barangay Estefania kag nagadangat sa masobra 200 ka mga drug users ang nakaschedule na para ipaidalum sa programa.
Magluwas kau Treyes, dakop man sa akto ang tatlo ka mga parokyano nga nagagamit sang iligal nga droga sa sulod sang drug den.
Ini ang ginalakipan nanday Airene Cantiga, 36 anyos, Junie Alisbo, 32 anyos kag Cherryn Panes, 40 anyos.
Nakuha sa ila paghinakop ang tatlo ka bulto kag apat ka sachet sang suspected shabu nga ginabanta nagabug-at sang 15 gramos kag may estimated street value nga P102,000.
Ang mga suspetsado ang gindala na sa kustodiya sang PDEA Office kag igapaidalum sa drug test samtang ginalauman naman nga mafile na ang kaso batok sang mga ini subong nga adlaw.
