Patay ang isa ka anay Punong Barangay nga ginakabig high value individual kag yara sa top 10 drugs watch list sang Police Regional Office 7 matapos ginaalegar nagbato sa mga otoridad sa ginpatigayon nga buybust operations pasado alas 07:00 kaina sang aga sa Purok 8, Barangay Minoyan, Murcia, Negros Occidental.
Ginkilala ang suspetsado kay Jennifer Mercader, 44 anyos, kasado, residente sang Borbon, Cebu kag anay punong barangay sa Barangay Lugo, northern Cebu.
Suno kay P/Lt. John Pual Tabujara, hepe sa Murcia Municipal Police Station, nadakpan ang suspetsado sadtong Marso 2018 bangud sa kaso sa iligal nga druga kag illegal possession of firearms.
Ginmonitor sang Regional Intelligence Division sang PRO 6 si Mercader bangud naangot man ini sa iban pa nga drug activities sa rehiyon.
Sa tion sang operasyon, ginpalupok ni Mercader ang iya armas sa mga operatiba gani ginbalusan man sang operatiba sa pagpalupok nga nagresulta sa pagneutralize sang mga pulis sa iya.
Narekober sa crime scene ang walo ka big sealed transparent plastic sachet sang suspected shabu, isa ka unit sang caliber .45 pistol nga may live ammunition kag fired cartridges kag isa ka unit sang 12 gauge shot gun.
Ang nakompiskar nga illegal nga druga ang ginabanta nagabalor P 472,000.
Suno sa report, si Mercader ang nakapalagyo sa Medellin District Jail sa Cebu sadtong Marso 5, 2020.
Ang suspetsado ang isa man ka self-confessed killer nga nag-ako sa pagpatay kay Police Lt. Col. Joie Yape, isa ka police officer sa Cebu.
Samtang, nakompirmar nga si Mercader ang naangot man sa pila ka mga drug activities kaangay sang buybust operation sang Agosto 27, 2020 sa Barangay Taculing, Bacolod City kun sa diin nakapalagyo ini apang natigayon nga mapasakaan sang kaso.
Sa karun, yara na sa puneraryo ang bangkay sang nasambit nga suspetsado.
