Patay ang isa ka drug personality nga nakaligad nga tuig lamang nakagwa sa prisuhan bangod sa illegal nga droga matapos ginluthang sa San Juan Baybay Street, Barangay 6, San Carlos City alas-8:30 kagab-i.
Sa interview sang Bombo Radyo Bacolod kay Police Lt. Col. Eduardo Corpuz, officer in charge sa San Carlos City Police Station, ang biktima ang ginkilala nga si Weber Mondragon alias Danny, 51 anyos, residente sa Barangay San Benito, Calatrava.
Ang biktima ang nagalakat malapit sa iya boarding house sang ini ang ginsundan sang duha ka persona kag ginluthang.
Ini ang nakaangkon sang igo sang bala sa tangkugo kag likod nga gintunaan sang iya kamatayon.
Narecover sa crime scene ang duha ka empty shell kag isa ka deformed slug sang cal. 45.
Suno kay Corpuz, si Mondragon ang may-asawa sa Calatrava apang may live-in partner sa ciudad sang San Carlos.
Ginapahayag nga ang biktima ang nakagwa sa prisuhan nakaligad lamang nga tuig sa kaso nga Republic Act 9165 ukon Comprehensive Dangerous Drugs Act of 2002.
May-ara naman sang eye witness sa krimen nga nakatumod sang mga suspetsado gani sila ang may-ara na sang duha ka persons of interest.
Ang duha ka persons of interest ang lunsay may kaangtanan man sa illegal nga droga gani kalakip ini sa angulo nga ila ginatutukan kasubong man ang personal grudge ukon dumot.
Sa paglibot sa area, nakita man nila nga may-ara sang mga CCTV cameras, kag ang footage ang nagpasolidify pa sa mga persona nga ginpahayag sang mga witness.
Paathag ni Corpuz, nga drug personality man ukon indi, ihatag nila ang nagakaigo nga hustisya para sa biktima.
