Patay ang isa ka lalaki matapos ginluthang sa Purok Tahong, sa tupad lamang sang Barangay Hall sang Barangay 2, Bacolod City kaina kapin alas-3:00 sang aga.
Sa interview sang Bombo Radyo Bacolod kay P/Lt. Santiago Gaitan, deputy chief sa Bacolod Police Station 2, ang biktima ang ginkilala nga si Stephen Bachoco, residente sa nasambitan nga lugar.
Pahayag ni Gaitan, nga sila ang nakabatun sang report gikan kay Barangay Tanod Stanley Sancua nga amo ang una nga nakabati sang duha ka lupok.
Gilayon man ini nga ginpadulungan sang mga kapulisan kun sa diin nasapwan ang nagahamyangon nga bangkay sang biktima.
Paathag ni Gaitan nga wala nakita sang Barangay Tanod ang natabo nga pagpaniro kag naabtan na lamang nga nagahamyangon na ang biktima kag nakaangkon sang igo sang bala.
Si Bachoco ang anay napriso naman bangod sa iligal nga droga, halos apat ka tuig na ang nakaligad.
Ini ang makabig gihapon nga drug personality bangod bisan ang utod sini ang nagapahayag nga mahimo padayun ang biktima sa pagbaligya sang shabu.
Sa karun, padayun ang imbestigasyon sang Bacolod Police Station 2, agud matumod kun sin-o ang suspetsado sa krimen.
