Pilason ang 37-anyos nga drug surrenderer matapos ginpaarakan sang luthang ang ginadala sini nga awto sa atubang sang Trinity Christian School sa Villa Angela Subdivision, Barangay Villamonte ciudad sang Bacolod kagab-i.
Ginkilala ang biktima kay Mark Anthony Cubos, 37-anyos kag residente sang Purok Kamoteng Kahoy, Barangay 4, Bacolod City.
Sa interview sang Bombo Radyo Bacolod kay P/Major Charles Gever, hepe sang Bacolod Police Station 4, sakay ang biktima sa Toyota Vios nga duag gray sang gintambangan kag ginpaarakan ini sang luthang sang mga wala pa makilal-an nga mga suspetsado nga sakay man sa Toyota Innova nga duag pula.
Suno kay Gever, nakaangkon sang igo sang bala sa guya kag sa dughan si Cubos.
Apang, nakatigayon pa ini nga maka-maneho padulong sa check-up point sa Helvetia Heights Subdivision, Barangay Villamonte agud magpangayo sang bulig.
Santo sa inisyal nga imbestigasyon sang kapulisan, may yara sang 10 ka igo sang bala ang kilid nga bahin sang salakyan ni Cubos kag may duha naman sa atubangan.
Indi pa karon matumod kun ano ang motibo sa krimen kag indi pa makahambal ang hepe kun may kaangtanan ini sa iligal nga druga.
Suno kay Gever, ila pa ginahulat nga mangin estable ang kahimtangan sang biktima agud mapamangkot ini sang husto.
Nahibaluan nga ang biktima ang padayon nga ginabulong sa isa ka pribado nga ospital sa ciudad.
