Ginpahayag sang Department of Social Services and Development (DSSD) Head sa syudad sang Bacolod nga challenge para sa ila ang Social Development Center (SDC) facility kun sa diin ginahamtang ang mga “Children in Conflict with the Law (CICL)” bangod ini ang mahapos lang mapalagyuhan.
Paathag ni Pacita Tero nga ang SDC ang nagapangatubang man sa kabudlayan sa paghandle sa mga kabataan partikular na nga ang mga house parents sa pasilidad ang lunsay mga Job Order employees lang gani dugay-dugay nga gina-islan.
Nagapati ini nga mas maayo kuntani kun magahire ang syudad sang bisan duha lang ka regular employee nga amo ang magapanabat para sa kaayuhan sang pasilidad kag magapatuman sang estrikto nga pagsulundan sa mga kabataan.
Aminado man si Tero nga indi secured ang SDC bangod madamo sang sarang malutsan agud makapalagyo gani may mga nagapanugyan nga dapat mas pataason ang pader sang pasilidad.
Apang nagapati ang DSSD head nga bisan ano ka taas ang pader, kun luyag sang bata ang malagyo mangita gid ang mga ini sang pamaagi.
Gani ang ginalantaw sini nga mas maayo nga solusyon amo ang pagpaathag sa mga kabataan sang rasun kun ngaa may-ara sang estrikto nga pagsulundan sa sulod sang SDC kag ipaathag nga para man sa ila puturo ang rehabilitation program.
Dapat nga matanom sa mga kabataan suno diri nga ang SDC ang ila naman nga balay kag may-ara sila sang ginikanan sa sulod ukon house parents nga apisar may pagka-estrikto, may ara gihapon sang concerns para sa mga kabataan.
