Padayon ang validation sang Department of Social Services and Development (DSSD) sa mga nasurveillance nga street dwellers sa Bacolod Public Plaza.
Sa interview sang Bombo Radyo Bacolod kay DSSD Head Alma Gustilo, ang 16 ka street dwellers nga ila natipon sa clearing operations ang ginapaidalom na sa validation.
Kun sila ang residente sa Bacolod City ang mga ini ang irefer sa ila tagsa ka Barangay apang kun tumandok sa iban nga banwa ukon ciudad, sila ang magapakig-angot man sa natungdan nga local government unit.
Paathag sini nga mga street dwellers ang ila ginatutukan bangod ang mga manicurista ang nagapauli lamang kun gab-i.
Apang pasalig sini nga may ihamtang nga Public Order and Safety Office (POSO) Guard sa public plaza kag Anti-Mendicancy Task Force nga magapatigayon sang roving kada gab-i agud may makasaway sa mga nagatulog sa lugar kasubong man sa nagabilin sang mga pagkabutang.
Suno diri, napaathag naman sa mga ambulant vendors kag mga manicurista nga indi manami tulukon nga may mga stalls ukon tent nga yara sa public plaza partikular na kun gab-i.
Samtang ang mga street dwellers nga matumod nga may mental disorder ang ila man irefer nga mapaidalom sa psychiatric medication kag tun-an man kun kinahanglan nga ihamtang sa Paglaom Mental Health Rehabilitation Center.
Samtang kun ang mga ginikanan ang may mental illness kag sila ang may magagmay nga kabataan, ang mga ini ang mahimo man nila nga mabutang sa institusyon.
