Nagdangop sa Bombo Radyo Bacolod ang isa ka senior citizen kag person with disability (PWD) gikan sa Barangay Villamonte, Bacolod City bangod sa wala ini makabaton sang social pension.
Pahayag ni Sotero Balagosa, 69 anyos, nga nakahibalo nalang ini nga nakabatun na sang social pension ang mga kaupod sini nga senior citizen, gani nagdangop ini sa ila Barangay Hall.
Aminado naman ang personnel sang Barangay nga may pangalan na ang benepisyaryo, apang wala ini nagsabat sang siya ang gintawagan.
Panindugan ni Balagosa nga wala ini sang nabaton nga tawag kag wala man sang nagpahibalo sa iya.
Ginakwestyon man sini kun ngaa wala nalang ginhatag sa iya ang kwarta apisar nga yara na ini sa Barangay Hall, kag ginpangayo lang ang cellphone number niya.
Natingala man ang tagreklamo kun ngaa ginpangayo pa ang numero sini kun gintawagan na ini sang mga personnel sang tion sang pag-abot sang social pension sang tinalikdan.
Ginpakigbahin man sini nga nakabatun na ini sang social pension nga P6,000 sang tinalikdan nga tuig kag nakabatun ini liwat sang P3,000 sang nakaligad nga mga binulan.
Ginahingyo sini nga mahatag ang iya nga benepisyo bangod naga-isahanun lang ini sa balay kag nagakinahanglan man siya sang inugbakal sang maintenance nga bulong.
Samtang, kasunod sang reklamo sang isa ka senior citizen sa Barangay Villamonte nga wala makabatun sang social pension, gin-eksplikar naman ni Bacolod City Department of Social Services and Development (DSSD) Head Pacita Tero nga ang Department of Social Wellfare and Development (DSWD) Regional Office amo ang nagapadalo sang disbursement officer nga amo ang nagapanagtag sang kwarta sa tagsa ka benepisyaryo sa mga Barangay.
Ang mga ini ang nagadugay naman sang tatlo ka adlaw sa syudad.
Suno kay Tero, apat ukon lima ka adlaw antes pa ang pag-abot sang mga disbursement officers, ginahatag naman sang mga ini ang pangalan sa mga barangay para sa posting, sa mga fiscal president kag kasubong man sa mga social workers nga assigned sa barangay para sa pagpahibalo sa mga benepisyaryos.
Paathag ni Tero nga nagabuligay ang mga ini agud nga mapahibalo sa mga senior citizen kag mabatun ang pay-out sa adlaw sang pagtagtaganay.
Kun indi mabatun sang benepisyaryo, ginapangitaan man ini gilayon sang substitute gikan sa mga yara sa waiting list nga mga senior citizen.
Paathag sang DSSD Head nga ginahatag sa duha ka semester ang hatagay nga natunga sa Enero tubtob Hunyo kag Hunyo tubtob Desyembre sa balor nga P3,000.
Ang ginhatag sang nakaligad amo ang para na sa Hunyo tubtob Disyembre.
Ginapangitaan ang mga ini sang substitute agud nga ma-zero na ang pondo sang ahensya, bangod indi ang mga ini pagpanaugan sang panibag-o nga pondo kun indi ma liquidate ang nauna nga pay-out.
Kun indi makaclaim ang isa ka benepisyaryo, mahimo naman nga mapanas ang pangalan sang mga ini sa listahan sa masunod nga paghatag sang social pension.
Gani pahanumdom ni Tero nga dapat yara gid ang mga benepisyaryo sa tion sang pay-out akun magreklamo tatlo ka adlaw matapos sini bangod mahimo nga wala pa nakabalik sang Regional Office ang mga disbursement officers.
Bangod sa wala na ini nakaclaim, panugyan nalang sang DSSD Head bnga magpadulong ang senior citizen sa ila opisina agud ma-update ang pangalan para sa masunod nga tuig.
Paathag sini nga may ginhatag nga alokasyon kun sa diin magafinance naman ang lokal nga gobyerno sa masunod ka mangin prayoridad nila diri amo ang mga senior citizen nga nadula na ang pangalan sa listahan.
Pinaagi sini, mahimo nga makabatun liwat ang tigulang sang benepisyo sa masunod nga tuig.
